Marrëveshja e 14 marsit, ndërkombëtarët vizitojnë Mitrovicën e Veriut

Pak javë pas marrëveshjes rreth Ligjit për të Huajt, zyrtarë të lartë të Bashkimit Evropian, por edhe të vendeve të QUINT-it, gjatë së enjtes kanë qëndruar në Mitrovicë të Veriut. Për këtë vizitë, ka njoftuar ushtruesja e detyrës së shefes së Zyrës së BE-së në Prishtinë, Eva Palatova. Ajo ka njoftuar se kjo vizitë bashkë me përfaqësues të shteteve të QUINT-it ka pasur për qëllim të njoftohen për procedurat në Zyrën për Regjistrimin Civil të Komunës, që ndodhen në Mitrovicë të Veriut. Palatova ka thënë se kanë inkurajuar banorët e kësaj komune që të shfrytëzojnë marrëveshjen e 14 marsit rreth Ligjit për të Huajt dhe ka thënë se BE-ja do të vazhdojë të angazhohet me Qeverinë e Kosovës dhe komunitetin serb në Kosovë për zbatimin e saj. “Ne i inkurajuam banorët vendas të shfrytëzojnë marrëveshjen e 14 marsit. BE-ja do të vazhdojë të angazhohet me Qeverinë e Kosovës dhe komunitetin serb të Kosovës për zbatimin e saj”, ka shkruar ajo. /Klankosova.tv