Mbetjet njerëzore të gjetura 50 vjet më parë në Florida, identifikohen përmes testit të ADN-së

Zyra e Sherifit të Qarkut Palm Beach ka identifikuar mbetjet njerëzore që u gjetën gati 50 vjet më parë me ndihmën e testimit gjenealogjik. Gjatë një konference shtypi të enjten, detektivi Bill Springer, njoftoi se mbetjet e gjetura në qershor të vitit 1974 i përkasin 15-vjeçares Susan Gale Poole, e cila u zhduk në Broward County pak para Krishtlindjeve në vitin 1972. Eshtrat e Poole u identifikuan pas testimit gjenealogjik nga Othram Labs, një laborator privat mjekoligjor që përdor sekuencën e gjenomit për të ndërtuar profile të ADN-së, sipas Springer. "U vendos nga zyra e sherifit dhe mbikëqyrësit e mi që ne do të dërgonim mbetjet e panjohura të vajzës nga viti 1974. Falë Othram-it, ata ishin në gjendje ta identifikonin atë dhe të ndërtonin një profil”, tha Springer. Shkencëtarët përdorën atë profil të ADN-së për të identifikuar nënën dhe vëllezërit e motrat e Poole. Nëna e Poole është ende gjallë. Poole ka lindur më 12 shkurt 1957. Në kohën e zhdukjes së saj, Poole jetonte me familjen e saj në Fort Lauderdale. Detektivët besojnë se Poole mund të jetë viktimë e Gerard Schaefer, i cili u dënua në vitin 1973 për dy akuza për vrasje në shkallën e parë pas vdekjes së dy adoleshentëve nga Florida. Schaefer vdiq në burg në vitin 1995, thotë Springer. Tani për tani, nuk ka asnjë provë fizike, vetëm prova rrethanore, që e lidh Schaefer me vrasjen e Poole, sipas Springer.