Në kryeqytet ka filluar të implementohet programi për vizita tek gratë shtatzëna ose që janë bërë nëna për herë të parë. Të premten tre infermiere shkuan tek familja Shala në Bardhosh të Prishtinës, të cilës para 3 ditësh iu shtua një anëtar i ri.
Tutje parashihet që të ketë pesë vizita për fëmijët brenda 3 viteve, porse me kërkesë të prindërve ato edhe mund të shpeshtohen. Nëna e re, Albina Gashi, tregoi shqetësimet e saj të para dhe e vlerësoi shumë nismën.
E pas procedurave të regjistrimit, këshilla ka edhe për babin. Programi ka filluar më 25 janar dhe deri më tani janë realizuar 14 vizita.
“Në përgjithësi si proces po shkon mirë, familjarët po e mirëpresin shumë mirë. Telashe po kemi me vendndodhjen e familjeve dhe adresat e sakta”, tha Afërdita Krasniqi, Koordinatore e Programit, raporton “Ju Flet Prishtina”.
Ndërkohë që për mëmësinë do të përgatiten edhe gratë shtatzëna, pasi parashihet të ketë nga dy 2 vizita edhe për to.
“Gjatë 4 vjetëve të ardhshme kompletohet si program dhe pastaj do të vazhdojë, diku i bie që rreth 80,000 vizita me i pas në vit ky ekip, duke pas parasysh që numri i lindjeve që ka Prishtina është mbi 4000”, deklaroi Izet Sadiku, drejtor i Shëndetësisë në Komunën e Prishtinës.
Në kuadër të ekipit të ndarë për këtë projekt ka edhe mjekë e punëtorë social, që të mund të identifikohen të gjitha shqetësimet e mundshme në zhvillimin e fëmijës. Kurse deri më tani janë trajnuar 35 punonjës shëndetësorë, dhe po planifikohet që ky numër të rritet.
“E kemi filluar në lagjen e Bregut të Diellit, duke e marrë parasysh se është një lagje shumë e zhvilluar në aspektin demografik dhe tash do të blejmë shërbime, do të punësojmë staf të ri dhe deri kah prilli po besojmë do të fillojmë në krejt qytetin.” shtoi tutje ai.
Projekti përkrahet nga Ministria e Shëndetësisë dhe UNICEF derisa në Kosovë komunat e para kishin filluar implementimin në vitin 2014, por kryeqyteti në mungesë të stafit e filloi në sivjet. /Klankosova.tv
https://youtu.be/orkKqGfPlFs
●●●
ASHKRIMI NGA
A
Editorial nga Klan Kosova — ndjek video lajme dhe zhvillimet e tjera kryesore të vendit.
