Mbledhësi i anekdotave Zogiani: Anekdotat janë pjesë e trashëgimisë shpirtërore (VIDEO)

Të shtunën në emisionin "Familja ime" me Mirjeta Morina në Klan Kosova i ftuar ishte mbledhësi i anekdotatave shqiptare Salih Zogiani. Zogiani tha se anekdotat janë pjesë më e pëlqyer, e kërkuar dhe më e përhapur e trashëgimisë shpirtërore. "Trashëgimia shpirtërore ka rëndësi shumë të madhe për kulturën, shkencën dhe historinë, sidomos për popujt të cilët kanë qenë gjatë të robëruar dhe që nuk kanë pasë mundësi t'i shënojnë ngjarjet. Ne kemi pasë robëri të gjatë shumë shekullore - romake, bizantine, osmane - pastaj okupimi serb dhe të tjera dhe nuk kemi pasur mundësi as për shkollim e as për liri për t’i shënuar ngjarjet historike”. Ai tha se ngjarjet historike, në pamundësi për t’u shkruar, janë ruajtur brez pas brezi përmes anekdotave, këngëve dhe fjalëve të urta. "Kurdo që do të shkruhet historia jonë e vërtetë pa trashëgimi nuk ka histori. Ne kemi trashëgimi për lakmi, bile Fishta trashëgiminë shpirtërore e quan palca e kombit, ndërsa Lasgush Poradeci e quan tapia e kombit dhe vërtetë është tapia e kombit pa të cilën nuk mund të shkruhet historia". Salih Zogiani thotë se anekdotat, këngët dhe fjalët e urta që datojnë qysh moti janë pjesë përbërëse e historisë së shqiptarëve. https://www.youtube.com/watch?v=x1pZv6Ps9Bg