Mehmet Bogujevci përfiton mbështetje të përhershme financiare nga qeveria

Qeveria e Kosovës, ka marrë vendim që Mehmet Bogujevcit, ish-boksierit olimpist, t’ia japë nga 500 euro në muaj. Ky vendim është marrë të premten në bazë të rregullores për Mbështetje të Përhershme Financiare të Sportistëve. Vendimin për përkrahje të përhershme, Bogujevcit ia ka ndarë Kujtim Shala, ministri i Kulturës, Rinisë dhe Sportit. “Sportisti Bogujevci si fitues i Medaljes së Argjendtë në Kampionatin Botëror të organizuar më 1978-tën në Beograd, është shpallur si kandidati përfitues i mbështetjes së përhershme financiare, e cila do të realizohet çdo muaj të vitit kalendarik në mënyrë retroaktive nga data 1 korrik 2016”, njofton Ministria e Kulturës, transmeton Klan Kosova. Vendimi është marrë nga Ministri Shala, pas shqyrtimit të kërkesës dhe dokumentacionit të bashkëngjitur, që ka ardhur nga Federata e Boksit e Kosovës.