Ministri Shala takon drejtuesit e Xhudos

Ministri i Kulturës, Rinisë dhe Sportit, Kujtim Shala,  sot ka zhvilluar takimin e fundit për vitin 2015. Ai ka takuar kryetarin e Federatës së Xhudos së Kosovës, Agron Kuka, dhe përzgjedhësin e Kombëtares së Kosovës në xhudo, Driton Kuka. Ata folën për të arriturat dhe sfidat të cilat i ka kaluar xhudoja kosovare në vitin 2015 si dhe programin e sfidat që e presin këtë sport në vitin e ardhshëm, me theks përgatitja për Lojërat Olimpike “Rio 2016” dhe arritja e rezultateve kulmore në këtë ngjarje të rëndësishme ndërkombëtare. Drejtuesit e FXHK-së e informuan ministrin Shala me aktivitet që ka organizuar e zhvilluar Federata në 2015-të, pjesëmarrjen në shumë ngjarje ndërkombëtare dhe punën me klubet brenda për brenda Kosovës Ata e njoftuan ministrin Shala edhe për përgatitjet intensive që po bën Përfaqësuesja e Kosovës për Lojërat Olimpike “Rio 2016”, ku synimi është që të sillet medalje olimpike në Kosovë. Krerët e xhudos e vlerësuan punën e ministrit Shala, sidomos për mbështetjen e tij dhe të MKRS-së dhënë për Federatën, ku përmes memorandumeve të bashkëpunimit që ministria nënshkruan me federatat e sportit, e ka përshpejtuar dhe bërë më të lehtë procedurën e mbështetjes financiare për federatat, shkruan në një komunikatë të dërguar nga Ministria e Kulturës, Rinisë dhe Sportit. Ministri Shala e vlerësoi punën dhe rezultatet që ka arritur FXHK-ja dhe u shpreh se edhe në vitin e do të vazhdojë bashkëpunimin e ngushtë me FXHK-në dhe përkrahjen e saj me qëllim të funksionimit sa me efikas të federatës dhe ngritjes së cilësisë së mëtejme, njofton Klan Kosova.