“Mirror” ia përgjoi telefonin, Princi Harry e fiton rastin në gjyq

Princi Harry ka fituar pjesërisht rastin e tij të hakimit të telefonit kundër “Daily Mirror”, pas një gjykimi që ka implikime të mëdha për mediat britanike. Gjatë një gjyqi dramatik shtatë-javor në gjykatën e lartë këtë vit, Duka i Sussexit pretendoi se ai ishte shënjestruar nga botuesi i gazetës për vite me radhë, duke e akuzuar atë për hakim të telefonave dhe sjellje të tjera të paligjshme për të marrë informacione për jetën e tij private. Harry u bë i pari anëtar mbretëror në 130 vjet që u paraqit në cilësinë e dëshmitarit në gjyq, pasi ai i tha gjykatës se dhjetëra lajme – për marrëdhënien e tij me ish të dashurën e tij Chelsy Davy dhe familjen e tij, si dhe aspekte të shërbimit të tij ushtarak dhe pretendimet për përdorimin e drogës – u publikuan në “Daily Mirror”, “Sunday Mirror” dhe “People” midis 1995 dhe 2011 pasi u morën në mënyrë të paligjshme. Gjykimi ekspozoi metodat e gazetave tabloide britanike, si dhe rolet e ish-redaktorit të Mirror, Piers Morgan dhe rrjetit të hetuesve privatë. Avokatët e Harryt argumentuan se redaktorët dhe drejtuesit e lartë në “Mirror Group Newspapers Ltd” (MGN) dinin për keqbërjet e brendshme – akuza që MGN, e cila është në pronësi të “Reach”, tha se nuk mbështeteshin nga provat. Harry ishte profili më i lartë i më shumë se 100 pretenduesve – përfshirë këngëtaren Cheryl dhe pasurinë e George Michael – të cilët ishin të përfshirë në një proces gjyqësor më të gjerë. Ai po kërkonte 440,000 funte dëmshpërblim, potencialisht një nga marrëveshjet më të mëdha të hakerave të telefonit. Përfaqësuesi i Princit Harry, David Sherborne foli jashtë gjykatës, duke lexuar një deklaratë nga duka. “Gjykata ka vendosur se aktivitete të paligjshme dhe kriminale janë kryer në të tre titujt e gazetës ‘Mirror Group’... në baza të zakonshme dhe të përhapura për më shumë se një dekadë”, tha ai. “Ky rast nuk ka të bëjë vetëm me hakimin, por ka të bëjë me një praktikë sistematike të sjelljes së paligjshme dhe të tmerrshme, e ndjekur nga mbulimi dhe shkatërrimi i provave”. Princi tha se ka mësuar se durimi është një virtyt “përballë gazetarisë hakmarrëse”. “Jam i lumtur që e kam fituar çështjen, veçanërisht pasi ky gjyq shikonte vetëm një të katërtën e të gjithë pretendimit tim”. Botuesi “Mirror” “kërkon falje” Botuesi i “Daily Mirror” ka lëshuar një deklaratë pas gjykimit. Një zëdhënës i Gazetave “Mirror Group” thotë: “Ne mirëpresim gjykimin e sotëm që i jep biznesit qartësinë e nevojshme për të ecur përpara nga ngjarjet që ndodhën shumë vite më parë”. “Aty ku ka ndodhur keqbërje historike, ne kërkojmë falje pa rezerva, kemi marrë përgjegjësinë e plotë dhe kemi paguar kompensimin e duhur”.