Mitrovica gati për turneun ndërkombëtar të boksit “Adem Jashari”

Janë bërë përgatitjet e nevojshme për mbajtjen e turneut ndërkombëtar të boksit “Adem Jashari”. Këtë njoftim e dha kryetari i Federatës së Boksit të Kosovës Ramadan Selimi. “Jemi në vazhdën e përgatitjeve për fazën e parë të turneut, për të cilën është treguar një interesim jashtëzakonisht i madh nga boksierë të shteteve të ndryshme. Me rastin e hapjes turneut do të ketë edhe program kulturor artistik si dhe është konfirmuar pjesëmarrja e boksierëve me renome botërore. Gjithashtu i pranishëm do të jetë edhe boksieri legjendar shqiptar, Luan Krasniqi i cili do ti sjellë edhe disa boksierë të famshëm nga Gjermania”. Në konferencën për media të pranishëm ishin edhe drejtori për Kulturë Rini dhe Sport i komunës së Mitrovicës Tafil Peci dhe zëdhënësi i Federatës së Boksit Latif Demolli. Peci tha se “Ky turne do të jetë madhështor me pjesëmarrje masive të boksierëve të njohur ku deri më tani dhjetë shtete e kanë konfirmuar pjesëmarrjen e tyre në këtë turne, andaj komuna e Mitrovicës ka bërë të gjitha përgatitjet e duhura në mënyrë që ky aktivitet të realizohet në mënyrën më të mirë të mundshme”. Ky turne organizohet nën patronatin e kryeministrit të Kosovës dhe në mbështetje të komunës së Mitrovicës, thuhet në njoftimin e komunës, përcjellë Klan Kosova. Turneu ndërkombëtare i boksit “Adem Jashari” do të mbahet në palestrën sportive “Minatori”  në Mitrovicë me datën 24/25.11.2018, nga ora 15:00 deri në ora 20:00.