MKRS-ja ndan çmimet për letërsi, Mehmet Kraja fiton në prozë e Xhevdet Bajraj në poezi

Ministria e Kulturës, Rinisë dhe Sportit i ka ndarë çmimet vjetore për letërsi. Adem Gashi u nderua me çmimin për vepër jetësore “Azem Shkreli”, për 40 vjetët e tij kontribut letrar. Çmimin në prozë “Anton Pashku” e mori Mehmet Kraja me romanin “Liria ime”, ndërkaq atë në poezi “Ali Podrimja” e fitoi Xhevdet Bajraj me veprën “Burri që lozte me engjëjt”. Çmimin për veprën më të mirë për fëmijë dhe të rinj "Vehbi Kikaj" e fitoi Shaip Grabovci me dramën "Zëra nga vitrina", teksa çmimin për veprën më të mirë në kritikë letrare dhe eseistikë "Ibrahim Rugova" e fitoi autorja Blerina Rogova-Gaxha për studimin "Vdekja në letërsinë moderne shqipe". Çmimi për veprën më të mirë të përkthyer në gjuhën shqipe "Pjetër Bogdani" iu dha Col Mehmetit, për përkthimin e veprës "Meditime" nga Mark Aureli. Juria që ka bërë përzgjedhjen e fituesve ka qenë në përbërje nga Agim Vinca – kryesues, Majlinda Bregasi, Isak Shema, Ag Apolloni dhe Ervina Halili.