MKRS: Ministri Çeku nuk ka mohuar se Kosova ka koreografë të diplomuar (VIDEO)

MKRS: Ministri Çeku nuk ka mohuar se Kosova ka koreografë të diplomuar Ministria e Kulturës, Rinisë dhe Sportit ka reaguar pasi disa koreografë të diplomuar jashtë vendit e kritikuan dje ministrin Hajrulla Çeku që tha se në krye të Baletit Kombëtar të Baletit, u vendosën edhe njerëz më shkollë të mesme, meqenëse në Kosovë nuk ka institucione të arsimit të lartë për këtë fushë. Ministria thotë se Ministri Çeku në asnjë moment nuk ka deklaruar se në Kosovë nuk ka koreografë të diplomuar, por se i është referuar një opinioni të lëshuar nga Avokati i Popullit. “Ne kemi koreografë shumë cilësorë me kontribut të madh në zhvillimin e baletit, të cilët janë shkolluar në Kosovë dhe shtetet e tjera. Gjatë intervistës televizive ministri ka dhënë sqarime në lidhje me procesin e rekrutimit të drejtorit të Baletit Kombëtar të Kosovës dhe i është referuar një opinioni të lëshuar nga Avokati i Popullit përkitazi me këtë proces”, thuhet në deklaratën e Ministrisë. “Në këtë opinion thuhet; ‘Avokati i Popullit vëren se në Republikën e Kosovës niveli më i lartë i arsimimit në fushën e baletit është shkollimi i mesëm, përkatësisht shkolla e mesme e lartë profesionale’. Prandaj, Avokati i Popullit, referuar kritereve të konkursit për drejtor të BKK, ka ardhur në përfundimin që përvoja profesionale e punës për balerinët duhet të llogaritet periudha prej momentit kur ata kanë lidhur marrëdhënie pune me Baletin Kombëtar të Kosovës, pa marrë parasysh a kanë pasur shkollim universitar, por vetëm ta kenë të përfunduar shkollimin e mesëm të lartë profesional në fushën e baletit”. “I gjithë diskutimi i ministrit ka qenë i fokusuar në këtë pikë dhe jo në vlerësimin mbi koreografët e Kosovës. Në sqarimin që ai ka ofruar duke u thirrur në opinionin e Avokatit të Popullit, i është referuar nevojës për themelimin e drejtimeve të shkollimit universitar në balet, ndërsa paqëllimshëm në një moment e ka përmendur edhe koreografinë”. Reagimi i Ministrisë vjen pasi Klan Kosova dje raportoi mbi këtë deklaratë të ministrit Çeku, që u përcoll me reagime nga koreografët. https://www.youtube.com/watch?v=0kDm9BMpqrA&t=47s