Mungojnë penjtë kirurgjikë në QKUK dhe spitalet rajonale, pacientët i blejnë vetë (VIDEO)

Në Qendrën Klinike Universitare ka mungesë të penjve kirurgjikë prej më shumë se një javë. Ndaj, disa pacientë të cilët në këtë premte iu nënshtruan ndërhyrjeve urologjike, fillimisht i siguruan penjtë absorbues dhe më pas hynë në sallë të operacionit. Një familjar i një pacienti tregoi për Klan Kosova se kanë shpenzuar 74 euro për blerjen e penjve, teksa shprehen të shqetësuar për situatën dhe gjendjen ekonomike. Dikush tjetër pagoi më pak për penj, por iu desh të blejë edhe gjëra të tjera esenciale siç janë çorapët elastike, jastëk dhe çarçafë. Mungesë të penjve “VIKRIL 3.0” të cilët treten dhe ata të llojit “NAJLON 3.0” joabsorbues për qepjen e lëkurës,  ka edhe në Klinikën e Kirurgjisë Vaskulare si dhe nuk ka as drena për plagët. Pothuajse të gjitha madhësitë e penjve të llojit “VIKRIL” mungojnë edhe në Kirurgjinë Abdominale në QKUK. Derisa, në Spitalin e Gjilanit mungojnë  tri lloje të penjve absorbuese me madhësi të ndryshme dhe po ashtu lloji “NAJLON”. ShSKUK ka treguar se këto mungesa vijnë për shkak se lënda është trajtuar për një kohë të gjatë në Organin Shqyrtues të Prokurimit dhe procedurat për furnizim janë duke u trajtuar në Zyrën e Prokurimit të këtij institucioni në mënyrë që të bëhet kontraktim. https://www.youtube.com/watch?v=UIxLFDXdEmc