Narkodileri shqiptar dëbohet nga Britania për të tretën herë

Britania po përpiqet të deportojë për të tretën herë një diler droge shqiptar pasi u burgos. Ronaldo Zani është kthyer disa herë fshehurazi në Mbretërinë e Bashkuar, pavarësisht se është deportuar dy herë për të qenë pjesë e një bande kriminale shqiptare. 26-vjeçari u deportua fillimisht në vitin 2019 pasi u gjet duke shitur kokainë, por u kthye muaj më vonë dhe u tha klientëve të tij: “Jam kthyer në punë”, raporton “The Telegraph”, transmeton Klankosova.tv. Ai u kap më vonë në posedim të rreth 5 mijë eurove, 24 gr kokainë, tre telefona “njëpërdorimësh”, si dhe peshore, lista marrëveshjesh dhe një kartë identiteti të rreme greke. Ai u deportua për herë të dytë në maj 2021 pasi u dënua me tre vjet burg. Por më 13 shkurt të këtij viti, një oficer policie e identifikoi atë duke drejtuar një Mercedes në Bournemouth. Shtetasi shqiptar u ndalua dhe gjatë kontrollit ndaj tij u mbi 2000 euro para të gatshme dhe 24,75 gr kokainë, e cila do të kishte një vlerë në rrugë deri rreth 3 mijë euro. Zani u tha autoriteteve se ai hyri në MB “disa muaj më parë” duke u fshehur në pjesën e pasme të një kamioni. Ai tha se fillimisht ishte punësuar si punëtor, por nuk fitonte mjaftueshëm për të shlyer kontrabandistët e tij dhe kështu filloi të punonte si korrier droge. Megjithatë, gjykatësi tha se ai “nuk kishte dhembshuri të vërtetë” për Zanin pasi ai e dinte se në çfarë po futej duke u kthyer ilegalisht në MB. Duke e burgosur Zanin për katër vjet në Gjykatën Mbretërore të Bournemouth, gjyqtari Richard Fuller tha se priste që ai të dëbohej përsëri. “Ju keni hyrë ilegalisht në vend duke e ditur se ose keni qenë në borxh ndaj atyre që po ju fusnin në pjesën e prapme të një kamioni ose do të ishit në borxh ndaj një grupi të krimit të organizuar”. “Vendi është i mbushur me grupe kriminale shqiptare dhe me bindjet tuaja të mëparshme do të kishit qenë plotësisht i vetëdijshëm se në çfarë po futeni”. “Nuk mund të ketë dhembshuri të vërtetë për ju që merrni drejtimin për të punuar për dilerët e drogës. Me dënimin tuaj, kam marrë parasysh që pa dyshim që do të dëboheni”, u shpreh ai. Zani pranoi se kishte mbërritur në Mbretërinë e Bashkuar pa leje hyrjeje të vlefshme, se posedonte pronë kriminale dhe kokainë me qëllim furnizimin dhe drejtimin e automjetit pa patentë ose sigurim. Jonathan Rees, avokati i tij, tha se “Z. Zani kërkoi të kthehej në Britaninë e Madhe për të punuar si punëtor në ndërtim dhe u kthye disa muaj para arrestimit të tij”. Një zëdhënës i Zyrës së Brendshme tha: “Shtetasit e huaj që kryejnë krime të tmerrshme nuk duhet të kenë asnjë dyshim se ne do të bëjmë gjithçka për t'u siguruar që ata të mos jenë të lirë në rrugët e Britanisë, duke përfshirë largimin nga Mbretëria e Bashkuar sa më shpejt të jetë e mundur”. “Që nga zgjedhjet ne kemi hequr 3,594 kriminelë të huaj, një rritje prej 16 për qind në të njëjtën periudhë të 12 muajve më parë”, ka thënë ky zëdhënës. /Klankosova.tv