Nazarko për Samitin Evropian në Tiranë: U tregua fytyra e një fronti kundër Rusisë

Opinionisti Mentor Nazarko, ka komentuar Samitin e Komunitetit Politik Evropian që u mbajt sot në Tiranë të Shqipërisë. Nazarko tha se përqendrimi aq i madh i udhëheqësve që përfaqësojnë vendet, përfshirë ato në konflikt, siç është rasti i Volodymyr Zelenskyt, udhëheqësve të BE-së dhe udhëheqësve të dy vendeve të tjera që ishin në konflikt të pjesshëm si Armenia dhe Azerbajxhani, e justifikojnë vëmendjen që mori nga mediet më të rëndësishme botërore ky samit. “Dhe ashtu edhe përpjekjen që u pa me një kontakt telefonik të tre udhëheqësve evropianë me presidentin Trump. Nëse do të ngelemi në rrafshin evropian, ajo rriti në një mënyrë të caktuar kompaktësinë e frontit evropian pro Ukrainës. Kompaktësinë e këtij fronti evropian pro Ukrainës me frontin amerikan, siç u duk nga biseda”, tha Nazarko në Edicionin Special në Klan Kosova. Tutje, ai u shpreh se gjatë këtij samiti u eksploruan mundësitë për të krijuar një treg që e kapërcen BE-në, por edhe u tregua fytyrë e përbashkët kundër Rusisë, “U eksploruan mundësi për të krijuar një treg që e kapërcen Bashkimin Evropian dhe po ashtu u fol për të adresuar në mënyrë të përbashkëta krizat e sigurisë që ka ky kontinent dhe iu tregua Rusisë një fytyrë e përbashkët. Fotoja familjare ishte fytyra e një fronti që ka arritur një emërues të përbashkët kundër Rusisë”, tha ai. https://www.youtube.com/watch?v=HDREHk2hwqU