Ndalohet një furgon në Viti, u sekuestruan mallra në vlerë të 5 mijë eurove

Policia e Kosovës në bashkëpunim me Doganën kanë arritur të ndalojnë një furgon në Viti, në të cilin kishte produkte pa fatura dhe pa prejardhje. Në njoftimin e lëshuar për media thuhet se automjeti ishte me targa vendore dhe drejtohej nga një kosovar. Mallrat, me vlerë mbi 5,000 eurove sipas çmimeve të tregut, u sekuestruan nga autoritetet doganore. “Gjatë kontrollit, në automjet u gjetën mallra tekstil, pajisje elektronike, mbathje sportive, të gjitha pa prejardhje dhe pa fatura, përfshirë produkte të markave tregtare të mbrojtura, që dyshohet se janë të falsifikuara”. “Hetimet e para kanë konstatuar se mallrat ishin transportuar përmes dy kompanive të postave të shpejta të cilat dyshohet se janë përdorur për dërgimin e paligjshëm të këtyre mallrave. Pasi pronari i automjetit nuk posedonte dokumentacion për mallrat, ai u shoqërua bashkë me automjetin në Terminalin Doganor në Ferizaj”, thuhet në njoftim. Rasti është duke u trajtuar nga Dogana e Kosovës në bashkëpunim me Policinë e Kosovës.