Ndërhyrjet në drejtësi: Kurti po frikëson gjyqtarë e prokurorë (VIDEO)

Aksioni që po udhëhiqej nga Prokuroria, u fut në top pesë ngjarjet e javës nga ekzekutivi. Madje, për bastisjen e sekuestrimin e vilave në rastin ‘Brezovica’, ministri i Brendshme, Xhelal Sveçla përgëzoi Prokurorinë e Policinë për realizimin e suksesshëm të operacionit. Me aksione të tilla, në samite ndërkombëtare u krenua kryeministri, Albin Kurti, duke përmendur këtë fakt si arsye për ngritje të Kosovës në indeksin e luftës kundër korrupsionit. Por, gjuha e pushtetarëve ndaj sistemit të drejtësisë, ndryshoi për 180 shkallë, kur cak i hetimeve e bastisjeve u bë një dikaster i qeverisë së tyre. Kryeqeveritari, në një videodeklarim hodhi akuza ndaj gjyqësorit e prokurorisë, pas arrestimeve të së premtës në ministrinë e tregtisë e industrisë rreth hetimeve për keqpërdorime me rezervat shtetërore, njofton Klan Kosova. Diskurs pak a shumë të njëjtë, veç në të shkruar patën edhe vartësëit e Kurtit. Për ish gjyqtarin, Kadri Kryeziu, këto qëndrime të pushtetit janë të gabuara e ndikojnë keq në sistemin e drejtësisë. Këto deklarime të Kurtit dhe vartësve të tij po konsiderohen edhe nga të pavarurit si cenim i pavarësisë të gjyqësorit e prokurorisë. Ndaj deklaratave të qeveritarëve pas bastisjeve e arrestimeve rreth aferës me rezerva shtetërore reagoi edhe Këshilli Prokurorial i Kosovës, që i quajti linçuese komentet e kryeministrit. https://www.youtube.com/watch?v=SlnWHUBcck8