Nëna dhe vajza e mitur cak i dhunës së babait dhe të birit në Tiranë, arrestohen

Policia në Tiranë ka arrestuar babë dhe bir, nën dyshimin se ushtruan dhunë fizike dhe kanosën me armë familjaret e tyre (gruan/nënën, vajzën e mitur/motrën). Në shtëpinë e E.M., 44 vjeç dhe A.M., 22 vjeç, u gjetën dhe u sekuestruan një armë zjarri kallashnikov, dy krehra dhe municion, transmeton Klankosova.tv. “Menjëherë pas njoftimit që morën për dhunë fizike dhe kanosje me armë zjarri, në një familje, në lagjen “Derede”, shërbimet e Komisariatit të Policisë Krujë organizuan punën dhe shkuan menjëherë në adresën e dhënë. Si rezultat i veprimeve të shpejta operacionale të kryera në kuadër të operacionit të koduar “On Time”, u parandaluan ngjarje të mundshme kriminale në këtë familje, duke arrestuar shtetasit E. M., 44 vjeç dhe A. M., 22 vjeç (babë e bir), të cilët dyshohet se kanë ushtuar dhunë fizike ndaj familjareve të tyre dhe i kanë kanosur me armë zjarri. Gjatë kontrollit në banesë, shërbimet e Policisë gjetën dhe sekuestruan 1 armë zjarri kallashnikov, 2 krehra dhe municion, që i posedonte pa leje, shtetasi E. M”, thuhet në njoftimin e policisë. Materialet procedurale iu referuan Prokurorisë së Tiranës, për veprime të mëtejshme.