Nëntori, muaji për bebet premature, neonatologët duan mbështetje urgjente shtetërore (VIDEO)

Nëntori është muaji i ndërgjegjësimit për foshnjat e lindura para kohe, madje jetëve më të reja, premature, u takon ngjyra vjollcë si simbolikë. Edhe në Kosovë, ashtu si në krejt botën, 1 në 10 foshnje lind premature. Pos kësaj, sfida rritet edhe më shumë për Klinikën e Neonatologjisë kur këto foshnje shoqërohen edhe me sëmundje të lindura. Veçse sipas drejtoreshës së kësaj klinike, Hajrie Ismajli, progresin e kanë arritur falë edukimit të vazhdueshëm profesional dhe trajnimeve. Derisa as suksesi nuk mungon te neonatologët e QKUK-së kur arrijnë të shpëtojnë jetë premature me masë trupore tejet të vogël, sikurse në rastet mbi 500 gramë. Por, hapja e specializimit për këtë lëmi po vonon tash e shtatë vjet, ani se po cilësohet si emergjencë kombëtare. E kështu, Kosova rrezikon ta humbë këtë shërbim jetik dhe të kthehet 25 vjet pas. Kryetarja e Shoqatës së Neonatologëve, Berbuqe Skenderi, thekson se vdekshmëria në vitet e pasluftës ka qenë 47%, derisa falë këtij profili kanë arritur që vdekshmëria të bie në 11% dhe në disa vite edhe në 8%. Neonatologia Skenderi thekson se opsioni i fundit u ka mbetur vetëm takimi me kryeministrin dhe presidenten në mënyrë që të trajtohet me urgjencë ky shërbim. Për nder të këtij muaji, aktivitetet kanë nisur këtë të premte për të vazhduar për katër javë. https://www.youtube.com/watch?v=UbcBlV08MyE