Netanyahu kërkon falje nga presidenti i Izraelit

Kryeministri izraelit Benjamin Netanyahu i ka paraqitur një kërkesë për falje presidentit të vendit, Isaac Herzog. Zyra e presidentit tha se Herzog do të merrte mendime nga zyrtarët e drejtësisë përpara se të shqyrtonte "kërkesën e jashtëzakonshme që mbart me vete implikime të rëndësishme". Netanyahu është përballur me gjyq për pesë vitet e fundit me akuzat për ryshfet, mashtrim dhe shkelje të besimit në lidhje me tre raste të ndara, shkruan BBC, transmeton Klankosova.tv. Ai mohon çdo shkelje. Ai tha në një mesazh video se do të kishte preferuar ta shihte procesin deri në fund, por interesi kombëtar "kërkonte ndryshe". Në fillim të këtij muaji, Presidenti i ShBA-së Donald Trump i kërkoi Herzog-ut që ta “falte plotësisht” kryeministrin.