Nga Brukseli në protestë, Berisha: U garantoj se Edi Rama kurrë nuk do mund të qëndrojë në atë karrige me zgjedhje të vjedhura

Kryetari i Partisë Demokratike në Shqipëri, Sali Berisha, është kthyer nga Brukseli për të marrë pjesë në protestën e subjektit që drejton. Para protestuesve, ai ka pohuar se ka njoftuar Bashkimin Demokrat Ndërkombëtar në Bruksel për shkeljet që ky pretendon se iu bënë PD-së në zgjedhjet e 11 majit. "Mbi 87 parti politike, para të cilave paraqita sot masakrën elektorale të Toto Rinos së Ballkanit apo El Çapos së Ballkanit, Edi Rama. Njoha miqtë me të gjithë shkeljet monstruoze dhe bindja e përgjithshme ishte se karrigia e Edi Ramës qëndron mbi krimin monstruoz të grabitjes dhe plaçkitjes së zgjedhjeve të qytetarëve shqiptarë". "Të dashur miq, forumi botëror i partive të qendrës së djathtë, u njoh me përdorimin nga Edi Rama të bandave më të rrezikshme të Shqipërisë, rajonit dhe Evropës. U njoh me listën e kandidatëve të krimit, me në krye Edi Ramën dhe vazhdon me Sara Milen, me ministrin e krimit, me Taulant Ballën, me dhjetëra kandidatë të tjerë të botës së krimit", ka thënë Berisha. Ai shtoi se zgjedhjet në Shqipëri ishin farsa elektorale më e shëmtuar pas rënies së "Perdës së Hekurt" në Ballkan dhe Evropë. /Klankosova.tv