Nuk i druhej kërcënimeve të Trumpit - kush është Ali Larijani, që Izraeli pretendon se e vrau?

Izreali ka pretenduar se e ka vrarë shefin e sigurisë së Iranit, Ali Larijani në një sulm ajror në Teheran. Shteti iranian akoma nuk ka deklaratë zyrtare, por nëse konfirmohet, Larijani bëhet figura më e lartë shtetërore që vritet pas liderit suprem të Iranit. Por kush është Ali Larijani? Ali Larijani ka qenë sekretari i Këshillit Suprem të Sigurisë Kombëtare (SNSC) të Iranit. Ai u emërua në gusht 2025 nga Presidenti Masoud Pezeshkian si sekretar i SNSC-së dhe si përfaqësues i Udhëheqësit të ndjerë Suprem të Iranit, Ajatollah Ali Khamenei, në këshill. Larijani është përshkruar gjithashtu në mediat iraniane si këshilltar i udhëheqësit të ndjerë suprem dhe shërbeu edhe si kryetar i parlamentit të Iranit për 12 vjet, nga maji 2008 deri në maj 2020. Ai është përshkruar si një "konservator i moderuar" vitet e fundit, raporton BBC, transmeton Klankosova.tv. Përpara se të bëhej kryetar i Dhomës së Përfaqësuesve, Larijani shërbeu si kryenegociator bërthamor i Iranit midis viteve 2005 dhe 2007. Vëllai i tij, Sadegh Larijani, është një tjetër figurë me ndikim atje, i cili kryeson një organ të lartë arbitrazhi që shërben si arbitër përfundimtar midis parlamentit dhe mbikëqyrësit kushtetues. Ndryshe, rreth një javë më parë, ishte pikërisht Larijani, i cili i ishte përgjigjur ShBA-së, ku ishte shprehur se Irani nuk ka frikë nga kërcënimet e Trumpit, duke shtuar se “edhe ato më të mëdha se ju nuk mund ta eliminonin kombin iranian”. Mirëpo, shefi kryesor i sigurisë së Iranit i ishte drejtuar edhe presidentit amerikan, duke i thënë “Ki kujdes, që të mos eliminohesh”.