Nxënësit lëndohen në sallat e edukatës fizike

Sallat e edukatës fizike nuk e plotësojnë asnjë standard për zhvillimin e aktiviteteve fizike në shkollat e kryeqytetit.  Kështu tha Jeton Nebiu, sekretar i përgjithshëm i federatës së sportit shkollor në Republikën e Kosovës  dhe njëherësh edhe profesor i edukatës fizike në Gjimnazin “Xhevdet Doda”. Në emisionin e kryeqytetit “ Ju flet Prishtina”  ai u shpreh se nxënësit janë ata që po e pësojnë për shkak të sallave jo të përshtatshme: “Edhe sa nxënës duhet t’i thyejnë këmbët derisa të rregullohet diçka”. Nebiu  po ashtu e ftoi drejtoreshën e arsimit, Arbërie Nagavci, që ta vizitojë shkollën dhe t’i sheh për së afërmi kushtet në cilat po zhvillohet ora e mësimit të edukatës fizike, njofton Klan Kosova. Por Nagavci tha se është e njoftuar me gjendjen e sallave dhe se ka qenë disa herë edhe në shkollën “Xhevdet Doda”, por sipas saj këto salla janë ndërtuar nga pushteti i kaluar. Nagavci deklaroi se është duke u punuar në përmirësimin e infrastrukturës fizike dhe krijimin e kushteve për zhvillimin e sporteve të ndryshme,  si në sporte kolektive ashtu edhe në ato individuale. Sipas saj, drejtoria  e arsimit ka furnizuar nëntë salla të edukatës fizike më pajisjet më të mira dhe janë rinovuar shumë terrene sportive  në oborret e shkollave të Prishtinës.