OAK: Shuma e përkrahjes për punëtorët duhet të jetë 220, jo 170

Oda e Afarizmit të Kosovës vlerëson se buxheti i ndarë për Planin Operacional për Pakon Fiskale Emergjente, nuk është i mjaftueshëm dhe se pakoja duhet të etë shpërndarje më të mirë, në mënyrë që të përballohen pasojat ekonomike të pandemisë së koronavirusit. Përmes një komunikate për media OAK ka bërë të ditur se i rekomandon qeverisë që shuma e përkrahjes për punëtorët duhet të jetë 220 euro, jo 170 siç është propozuar, dhe se shuma prej 41 milionë euro është shumë e vogël për të mbuluar shpenzimet, meqë në sektorin privat janë rreth 300.000 të punësuar. Ky institucion gjithashtu konsideron se është nevojë e menjëhershme që krijohen formularët për aplikim për bizneset lidhur me pagat e muajve mars dhe prill, të cilat do të mbulohen nga qeveria. OAK gjithashtu ka paraqitur një rekomandim për masën 6 - sigurimi i shtesës mbi pagë në vlerë prej 300 euro për punëtorët në terren dhe që janë të ekspozuar drejtpërdrejtë rrezikut të infektimit në punën e tyre. "OAK kërkon që shuma prej 15 milionë euro dedikuar për këtë kategori të hiqet dhe të kalojë në shumën dedikuar për punëtorët e sektorit privat. OAK ka kërkuar që paga në institucione publike të zvogëlohet për 50 %, ndërsa mjekët dhe kategoritë e propozuara të marrin pagë të plotë. Gjithashtu shuma prej 3 milionë eurove e dedikuar për punëtorët e dyqaneve ushqimore, furrave dhe barnatoreve, të kalojë tek masa 3 për pagat e të punësuarve të sektorit privat, pasiqë këto biznese janë duke operuar mirë. OAK kërkon që Qeveria të urdhërojë bizneset që të mos largojnë nga puna punëtorët e tyre, dhe të marrë përsipër pagesën e pagës, pasiqë ata janë aty për shkak që bizneset kanë nevojë për staf dhe situata e krijuar po ndikon edhe në këtë pjesë". Sa i përket tatimit në fitim, OAK kërkon që të konsiderohen vetëm nga të hyrat reale (jo faturimi por mjetet e inkasuara) që realizon biznesi gjatë vitit fiskal 2020 dhe të përllogaritet tatimi për këtë shumë. Kërkesë tjetër e paraqitur nga OAK është që të bëhet shtyerja e kësteve të kredive të qytetarëve dhe bizneseve për 3-6 muaj, duke mos përllogaritur kamatën gjatë kësaj periudhe, meqenëse bizneseve iu janë dërguar njoftime nga bankat komerciale që kamata do të përllogaritet për këtë periudhë. Gjithashtu, OAK konsideron që duhet të ndalohet hapja e procedurës së falimentimit të bizneseve gjatë kohës së krizës dhe 6 muaj pas saj. Sipas Odës së Afarizmit Kosovës për të ndihmuar që të arrihen shumat e kërkuara për përkrahje të biznesit dhe punëtorëve në sektorin privat, Kosova duhet të veprojë duke u bazuar në praktikat e shteteve tjera gjatë kësaj kohe të krizës pandemike, me ç'rast OAK ka paraqitur katër propozime për qeverinë. "OAK propozon që të ulen pagat gjatë kohës së krizës në sektorin publik dhe kompanitë publike për 50 % për të gjithë ata që nuk janë duke punuar; OAK propozon që të ulen pagat gjatë kohës së krizës së paku për 50% për parlamentin e Kosovës; OAK propozon që nuk duhet të ketë kompenzim përgjatë krizës për kryetarët dhe anëtarët e bordeve drejtuese dhe mbikëqyrëse të institucioneve publike, meqenëse nuk janë të angazhuar gjatë kësaj periudhe. Po ashtu është më se e domosdoshme që të ndahet një buxhet prej 100 milionë euro, si garanci sovrane për kompanitë që kanë vështirësi". "Sa për sqarim OAK ka bërë krahasim të masave me vendet e rajonit, konkretisht Maqedoni të Veriut dhe Shqipëri. Dhe për informacion Maqedonia ka ulur pagat e sektorit publik, duke i paguar njësoj me nga rreth 237 euro si ata të sektorit publik ashtu edhe ata privat. Kurse në Shqipëri paga që do të paguhet është rreth 210 euro" thuhet në komunikatë. OAK kërkon nga Qeveria e Kosovës që të merren parasysh këto rekomandime, në mënyrë që të kemi një balancë mes bizneseve private, institucioneve shtetërore dhe kompanive publike, që bashkarisht të tejkalohet situata e krijuar dhe të ndihmohet ekonomia e vendit nga një kolaps potencial.