Operacion i rrallë në QKUK, hiqen pllakat e “gjoksit të lindur me defekt” (VIDEO)

Në Klinikën e Kirurgjisë Torakale të Qendrës Klinike Universitare është kryer një intervenim, i cili më herët nuk është bërë në Kosovë. Operacioni ka të bëjë me largimin e pjesëve metalike, të cilat pacienti 16-vjeçar i kishte pasur brenda në gjoks për 24 muaj, në mënyrë që t'i korrigjohej defekti i lindur në murin e përparmë të gjoksit. Sikurse vendosja e pllakave, edhe largimi i tyre deri më tani është realizuar jashtë vendit. Mirëpo, me huazimin e mjeteve nga Klinika Ortopedike, kirurgët torakalë e kanë bërë largimin e këtyre pllakave dhe do ta bëjnë edhe në vazhdimësi. Drejtori i kësaj klinike, Nazmi Kolgeci, tha se kostoja për vendosjen e këtyre pllakave dhe largimit të tyre jashtë vendit është e lartë. I njëjti bën me dije se me këto mjete do të mund të bëheshin investime në klinikë, që të kryhej ky lloj operacioni nga faza e parë deri tek e fundit. https://www.youtube.com/watch?v=aOzs4Djn-Ws