"Ora e fundit": Policia e AKI në aksion, sekuestrohen 20 mijë tableta Ekstazi

Policia, gjegjësisht Drejtoria për Hetimin e Trafikimit me Narkotikë, në bashkëpunim me Agjencinë e Kosovës për Inteligjencë, e kanë zhvilluar një operacion të koduar "Ora e fundit". Në këtë aksion, një person ka përfunduar në pranga, thuhet në njoftimin e policisë transmeton Klankosova.tv. Vlera e tabletave (MDMA), llogaritet të jetë rreth 200 mijë euro. "Janë sekuestruar prova të shumta materiale, përfshirë: Shtatë (7) paketime të mbushura me substancë të dyshuar narkotike të llojit Ekstazi (MDMA);  Një veturë Daimler Chrysler E320 CDI, ngjyrë e zezë, me targa vendore. Po ashtu, është bastisur banesa e të dyshuarit në Prishtinë, ku gjatë bastisjes janë gjetur dhe sekuestruar tri (3) qese najloni të vogla me substancë të dyshuar narkotike të llojit marihuanë". "Me urdhër të Prokurorit kompetent, i dyshuari është ndaluar për procedura të mëtejme hetimore, ndërsa rasti po trajtohet si vepër penale e trafikimit të narkotikëve, në përputhje me legjislacionin në fuqi të Republikës së Kosovës. Policia e Kosovës përmes njësiteve të antidrogës, në bashkëpunim me institucionet dhe agjencitë e tjera relevante, mbetet e përkushtuar fuqishëm në luftimin e krimit të organizuar dhe parandalimin e shpërndarjes së substancave narkotike, me qëllim të garantimit të sigurisë publike dhe sundimit të ligjit në Republikën e Kosovës", njoftojnë organet e rendit./Klankosova.tv.