Kreu i Organizatës Botërore të Shëndetësisë (OBSH), Tedros Adhanom Ghebreyesus thotë se ekipet e tij kanë “përshkallëzuar operacionet tona” në Gaza që kur armëpushimi hyri në fuqi.
Në një postim në X, Ghebreyesus shkroi se OBSH-ja ka vendosur tashmë një ekip emergjence për të forcuar "kujdesin kirurgjikal dhe emergjent" në Spitalin Al Ahli në qytetin e Gazës, me plane për vendosje të mëtejshme, transmeton Klankosova.tv
Ai shtoi se tetë kamionë me furnizime mjekësore kanë hyrë në Gaza, ndërsa pajisje dhe ilaçe thelbësore janë transferuar në Spitalin Nasser në Gazën jugore.
"Sistemi shëndetësor i Gazës duhet të rehabilitohet dhe rindërtohet. Kjo krizë na jep mundësinë ta rindërtojmë atë më mirë: më të fortë, më të drejtë dhe të përqendruar te nevojat e njerëzve. Ilaçi më i mirë është paqja", tha ai. / Klankosova.tv
●●●
VZSHKRIMI NGA
Vanesa Zhugolli
Editorial nga Klan Kosova — ndjek lajme dhe zhvillimet e tjera kryesore të vendit.
