Pakënaqësitë, sfidat dhe të arriturat e Latifit, ky është raporti që i dërgoi Kurtit (DOKUMENT)

Pa i bërë akoma një vit si ministër i Shëndetësisë, Rifat Latifi i dorëzoi dorëheqjen kryeministrit Albin Kurti. Latifi në letrën e dorëheqjes shkroi se këtë vendim e mori me zhgënjim të thellë pas shumë reflektimesh që kishte bërë gjatë muajve të fundit, njofton Klankosova.tv. Latifi bashkë me dorëheqjen i dërgoi Kurtit edhe një raport të detajuar, të cilin e ka siguruar Klan Kosova, ku ka listuar të gjeturat, sfidat dhe arritjet në 10 muajt e parë. Te të gjeturat përfshihen parregullsitë e identifikuara nga Latifi në sistemin shëndetësor, por edhe brenda ministrisë. “Mungesa e profesionalizimit administrativ në Ministrinë e Shëndetësisë të shtresuar ndër vite, që për rezultat ka sjellë keqmenaxhime të mëdha dhe procedura arkaike të dizajnuara për të penguar zhvillimin e shëndetësisë së Kosovës, dhe menaxhim diktatorial i administratës që ka krijuar një atmosferë toksike në raport me kabinetin tim”, thotë njëra nga 13 pikat tek të gjeturat. Po ashtu përmendet edhe mungesa e aftësive menaxheriale në ShSKUK që Latifi ka vlerësuar se ia pamundëson zhvillimin këtij institucioni. “Buxheti i vogël dhe mungesa totale e projekteve kapitale për vitin 2022 ishte shembull i neglizhencës zhvillimore të shëndetësisë". Tek të arriturat, Latifi ka përmendur sigurimin e fondeve të reja për mbështjen e klinikave të QKUK-së dhe spitaleve rajonale, si dhe për zgjerimin e programit të telemjekësisë. Ai këtu ka përmendur edhe mundësinë e edukimit të stafit shëndetësor nëpër Evropë dhe sensibilizimin e diasporës për të ndihmuar shëndetësinë kosovare. "Kemi siguruar mundësinë e edukimit të stafit tonë klinik në Austri, Zvicër, Greqi, Izrael dhe shumë vende të tjera me të cilat jam duke punuar aktualisht". "Kemi arritur të sensibilizojmë diasporën tonë për ta ndihmuar shëndetësinë e Kosovës me programe involvuese, sikurse është bashkëpunimi i diasporës me Kolegjin e Kirurgëve të Kosovës dhe organizatat e ndryshme profesionale të mjekëve jashtë vendit". Në këtë raport janë përfshirë edhe shtatë shtyllat për zhvillimin e shëndetësisë së Kosovës, sipas Rifat Latifit, ku ndër të parat janë digjitalizimi i shërbimeve të kujdesit shëndetësor dhe pa dyshim kthimi i trurit - qëllim të cilin e kishte përnendur në zyrtarizimin e tij si ministër i Shëndetësisë. Më poshtë e gjeni raportin e plotë të Rifat Latifit drejtuar Albin Kurtit: