Partia Bhumjaithai fiton zgjedhjet në Tajlandë, nis bisedimet për koalicion

Partia konservatore Bhumjaithai e Tajlandës ka shënuar një fitore më të madhe se sa pritej në zgjedhjet e përgjithshme të së dielës, duke u pozicionuar si forca kryesore për formimin e qeverisë së re. Sipas mediave tajlandeze, me rreth 93 për qind të votave të numëruara, Bhumjaithai pritet të sigurojë të paktën 194 vende në Dhomën e Përfaqësuesve me 500 anëtarë. Kryeministri aktual dhe lideri i partisë, Anutin Charnvirakul, e cilësoi rezultatin si fitore për të gjithë tajlandezët dhe njoftoi nisjen e bisedimeve për krijimin e një koalicioni. Partia progresiste People’s Party u rendit e dyta me rreth 116 vende, ndërsa Pheu Thai, e lidhur me ish-kryeministrin e burgosur Thaksin Shinawatra, doli e treta me 76 vende. Anutin shpërndau parlamentin në dhjetor, pas më pak se 100 ditësh në pushtet, duke kërkuar një mandat të ri në një klimë nacionaliste pas konfliktit trejavor me Kamboxhian. Ai tha se formimi i qeverisë do të varet nga rezultatet përfundimtare dhe vendimet e brendshme të partive. People’s Party ka përjashtuar mundësinë e bashkimit në një koalicion të udhëhequr nga Anutin, ndërsa Bhumjaithai pritet të kërkojë mbështetje nga parti më të vogla. Një partner i mundshëm është partia Kla Tham, e cila parashikohet të fitojë rreth 58 vende, çka do t’i siguronte shumicën e nevojshme për formimin e qeverisë./Klankosova.tv