Partia e Mileit fiton zgjedhjet në Argjentinë, forcohet pushteti i presidentit për reformat ekonomike

Partia e presidentit argjentinas Javier Milei, La Libertad Avanza, ka shënuar një fitore të bujshme në zgjedhjet e mesmandatit, sipas rezultateve të para zyrtare. Ky sukses i jep Mileit më shumë fuqi politike për të vazhduar me reformat e tij radikale ekonomike, që përfshijnë masa shtrënguese dhe politika të tregut të lirë. Sipas rezultateve paraprake, La Libertad Avanza mori 40.84 për qind të votave për anëtarët e Kongresit, duke lënë pas koalicionin opozitar peronist, i cili siguroi 31.64 për qind të votave. Rezultatet bazohen në mbi 90 për qind të votave të numëruara. Këto ishin zgjedhjet e para kombëtare që testuan mbështetjen për Milein që nga ardhja e tij në pushtet dy vite më parë. Fitorja e tij shihet si sinjal i fortë për vazhdimin e kursit të reformave, si dhe për ruajtjen e mbështetjes nga Shtetet e Bashkuara, të cilat kanë ndihmuar Argjentinën me një paketë financiare shpëtimi. Në selinë e partisë në Buenos Aires, Milei e quajti rezultatin “një pikë kthese për Argjentinën” dhe premtoi se do të vijojë me reformat ekonomike./Klankosova.tv