Pas një aksidenti, 20 persona e rrahin shoferin në Durrës

Aksident mes dy mjeteve në Durrës, 20 persona dhunojnë fizikisht njërin nga shoferët Një aksident trafiku mes dy automjeteve ka ndodhur në Durrës, ku si rrjedhojë, situata është përshkallëzuar në përleshje fizike. Siç shkruan Euronews, pas debatit mes drejtuesve të mjeteve, situata u tensionua, ku njëri nga shoferët u rrah nga një grup të rinjsh të cilët ishin mbi 20 persona. Si pasojë e rrahjes, njëri nga shoferët ka pësuar thyerje të hundës dhe çarje në vesh, duke u transportuar me urgjencë në Spitalin Rajonal të Durrësit. Ai ndodhet jashtë rrezikut për jetën. Ndërkohë, drejtuesi i automjetit tjetër, pasi u largua nga vendngjarja, pak minuta më pas është vetëdorëzuar në polici për të dhënë detaje mbi ngjarjen. Raportohet se forca të shumta policie kanë mbërritur në zonë dhe po punojnë për zbardhjen e ngjarjes, duke sekuestruar pamjet e kamerave të sigurisë të bizneseve përreth për të identifikuar autorët e dhunës.