Pas "Shein", Franca raporton edhe 6 platforma të tjera për shitje të artikujve skandalozë

Qeveria franceze, e cila më parë raportoi gjigantin e tregtisë elektronike "Shein" te prokurorët, ka bërë të njëjtën gjë për gjashtë platforma të tjera, pesë prej të cilave shesin produkte të paligjshme, njoftoi të premten ministri i tregtisë. Platformat në fjalë janë "AliExpress", "Joom", "eBay", "Temu", "Wish" dhe "Amazon". Departamenti i mashtrimit i qeverisë zbuloi se "'AliExpress' dhe 'Joom' po shisnin gjithashtu kukulla me pornografi të fëmijëve" dhe se "Wish", "Temu", "AliExpress" dhe "eBay" "po shisnin armë të kategorisë A, të tilla si boksera dhe hanxharë", tha ministri Serge Papin për Le Parisien, transmeton Klankosova.tv Përveç kësaj, "Wish", "Temu" dhe "Amazon" “nuk arritën të përmbushnin detyrimet e tyre për të mbrojtur të miturit nga imazhet pornografike”, shtoi ai. Platforma e shitjeve "eBay" iu përgjigj AFP-së se vazhdon të "punojë pa u lodhur për të parandaluar shitjen e artikujve të ndaluar në platformën e saj" dhe "të bashkëpunojë" me "autoritetet rregullatore franceze për këtë çështje". Papin do të mbledhë ministrat e tregtisë nga vendet anëtare të Bashkimit Evropian më 27 nëntor për të diskutuar ndikimin e këtyre platformave në tregtinë brenda BE-së, tha ministria e tij për AFP. Shein ka qenë në telashe më parë Autoritetet franceze zbuluan se "Shein" po shiste kukulla seksi që i ngjanin vajzave, dhe më pas armë të kategorisë A. "Shein" hoqi të gjitha produktet e paligjshme nga faqja e saj e internetit, duke shmangur kështu pezullimin në Francë për momentin, por platforma mbetet subjekt i procedurave ligjore. Kompania aziatike me seli në Singapor, e themeluar në Kinë në vitin 2012, pritet t'u përgjigjet pyetjeve të zyrtarëve francezë të martën. Pasi hapi një dyqan fizik më 5 nëntor në dyqanin ikonik BHV Paris, "Shein" kishte planifikuar të hapte dyqane në pesë lokacione të tjera. Por hapjet e mëtejshme të dyqaneve janë shtyrë "për disa ditë ose disa javë" për të përshtatur "ofertën" dhe "politikën e çmimeve", njoftoi të premten Frederic Merlin, kreu i kompanisë që zotëron BHV. /Klankosova.tv