PDK pas mbledhjes së kryesisë: Rruga e vetme, kthimi te qytetari përmes zgjedhjeve të reja

Kryesia e Partisë Demokratike të Kosovës mbajti sot mbledhjen e radhës, ku u diskutua për zhvillimet e fundit politike, situatën institucionale në vend dhe për procesin e riorganizimit të brendshëm të partisë. Gjatë takimit, Kryesia vlerësoi se papërgjegjësia e shumicës parlamentare ka prodhuar këtë situatë siç u quajt, e panevojshme dhe e dëmshme për stabilitetin e vendit. PDK-ja ka vlerësuar se rruga e vetme për dalje nga kjo situatë është kthimi te qytetari përmes zgjedhjeve të reja. Kryetari i kësaj partie, Bedri Hamza theksoi se procesi i riorganizimit të brendshëm të partisë është i lidhur drejtpërdrejtë me gatishmërinë për të ofruar një alternativë serioze dhe të përgjegjshme qeverisëse. “PDK po riorganizohet për të qenë më afër qytetarëve dhe për të ndërtuar një ofertë të qartë politike që garanton stabilitet dhe zhvillim. Kosova ka nevojë për institucione funksionale dhe vendimmarrje të përgjegjshme, jo për improvizime dhe kriza të njëpasnjëshme”, tha kryetari Hamza. Kryesia e PDK-së ngriti gjithashtu shqetësimin për gjendjen ekonomike në vend, siç thuhet, duke vlerësuar se Qeveria po dështon t’i adresojë problemet reale të qytetarëve./Klankosova.tv