Për organet e drejtësisë në Pejë, rasti i Fatlind Hysenajt është i mbyllur (VIDEO)

Institucionet gjegjëse të drejtësisë kanë qenë fjalëpaka në rastin e gjykimit të aksidentit ku humbi jetën Fatlind Hysenaj, të cilit iu vesh edhe barra e shkaktimit të aksidentit. Prokuroria Themelore në Pejë ka ripërsëritur togfjalëshin se janë marrë të gjitha masat e nevojshme për hetim. Prokuroria nuk dha as shpjegim e as konfirmim nëse u intervistua edhe njeriu, i cili i pari pa aksidentin dhe lajmëroi policinë, intervistimi i tij nuk përmendet as në raportet fillestare të hetimeve e as ato më vonë, përveç që theksohet se janë marrë në pyetje katër dëshmitarë, dy policë dhe dy zjarrfikës. KIKS Kosova ka kërkuar përgjigje për rastin edhe nga Gjykata Themelore në Pejë. Ata thanë për KIKS-in se dosje për një rast të tillë nuk erdhi kurrë në gjykatë. Sipas Prokurorisë Themelore në Pejë, janë rregullat që përcaktojnë se kur një rast dërgohet në gjykatë që, sipas tyre, bëhet vetëm në rastet kur gjenden elementet e veprës penale. Hysenaj thotë se nuk do të dorëzohet, madje ka rrëfyer se rastin mund ta dërgojë për ta gjykuar edhe në Gjermani, në vendin ku jeton shoku i djalit të tij, Shkëlqim Kamberaj, për të cilin ai është i bindur se ishte duke vozitur në ditën kritike. Përgjigje mbi shkeljet për veprat e kundërvajtjes që pretendohet se u bënë para se të ndodhte aksidenti, fakti që Fatlindi nuk kishte patentë shofer e as autorizim për ta vozitur veturën, që ishte pronë e familjes së Shkëlqim Kamberajt, KIKS-i ka kërkuar edhe nga Drejtoria e Policisë Rajonale në Pejë, por të njëjtit kanë zgjedhur të heshtin. /Klankosova.tv https://youtu.be/6SolWeFIQ7M