Për pesë muaj shqiptohen afro 1800 gjoba ndaj konsumuesve të duhanit në ambiente të mbyllura

Ministria e Shëndetësisë po vazhdon pa kompromis zbatimin e Ligjit për Kontroll të Duhanit në të gjithë Kosovën. Lidhur me këtë, në pesë mujorin e parë të vitit 2024, janë zhvilluar mbi katër mijë inspektime me qëllim të ndalimit të konsumit të duhanit në ambiente të mbyllura, dhe si rrjedhojë janë shqiptuar 1 mijë e 724 gjoba për subjekte të ndryshme që kanë bërë shkelje të këtij ligji, njofton Klankosova.tv. "Qëllimi i Ministrisë së Shëndetësisë nuk janë shifrat në vetvete, por rezultatet nga aksionet e vazhdueshme, të cilat do të vazhdojnë deri kur duhani në hapësira të mbyllura të mos jetë më dukuri normale në vendin tonë", thuhet në njoftimin e ministrisë. Në këtë drejtim, përveç njoftimeve rreth inspektimeve dhe gjobave, është punuar edhe në plotësim-ndryshimin e Ligjit të ri për Kontroll të Duhanit, përmes të cilit do të ju bëhet zgjidhje edhe disa dilemave të evidentuara, të cilat në një formë ose tjetër ishin pengesë në respektimin e plotë të ligjit.