Përcaktimi i çmimit të barnave, ka përçarë farmacistët në Kosovë

Qeveria e Kosovës, javë më parë miratoi projektligjin për çmimin e produkteve medicinale. Përmes këtij çmimi, po synohen të ulen çmimet e barnave në Kosovë. Këtë projektligj e ka përkrahur Kryetari i Odës së Farmacistëve të Kosovës, Arianit Jakupi. Ai, në Sytë 7 në Klan Kosova, tha se 90 për qind e farmacistëve e kanë përkrahur këtë projektligj. Por, Jakupi tha se tani grupe të caktuara brenda odës dhe farmacistëve nuk po e duan këtë projektligj, dhe dëshirojnë që ai të mos kalojë në Kuvendin e Kosovës. Bile Jakupi, tha se këto grupe të interesit, që në ndonjë mënyrë përfitojnë nga çmimet aktuale të barnave, më të lartat në rajon, kanë tentuar dhe vazhdojnë të tentojnë ta rrëzojnë atë nga udhëheqësia e Odës, ndonëse mandati i tij ende nuk ka përfunduar. Kjo tendencë e këtyre grupeve, sipas Kryetarit të Odës, është vetëm për faktin që mbështet këtë ligj. Jakupi, në Klan Kosova, deklaroi se dëshiron me ngulm të votohet ky ligj në kuvend, pasi që përfitues më të mëdhenj janë qytetarët, të cilët po shpenzojnë dukshëm më shumë se në vende të rajonit. Bile, Jakupi konfirmoi se një lloj ilaçi që në Kosovë shitet 100 euro, i njëjti në Maqedoninë e Veriut mund të gjendet me 50 euro. Ai shtoi se edhe vet farmacitë mund të përfitojnë nga ky ligj, i cili balancon çmimet e barnave dhe produkteve medicinale.