Përgjigjja imune ndaj vaksinimit reduktohet nëse flini më pak se gjashtë orë

Gjumi për më pak se gjashtë orë në natë redukton përgjigjen e sistemit imunitar ndaj vaksinimit, veçanërisht te meshkujt më të rinj, ka sugjeruar një studim i ri. Reduktimi është i krahasueshëm me zbehjen e antitrupave për COVID-19, dy muaj pas vaksinimit. Reagimi imunitar i njerëzve ndaj vaksinimit dihet se ndryshon për shkak të faktorëve të tillë si mosha, gjinia dhe shëndeti i përgjithshëm. Studimet e mëparshme kanë sugjeruar gjithashtu se kohëzgjatja e gjumit mund të luajë një rol – megjithëse rezultatet e hulumtimeve të tilla kanë qenë të përziera. Për të përmbledhur gjendjen aktuale të të kuptuarit, Dr Karine Spiegel, nga Instituti Kombëtar Francez i Shëndetit dhe Mjekësisë, në Lyon, dhe kolegët e saj kombinuan dhe rianalizuan rezultatet e shtatë studimeve që përfshinin vaksinimin e njerëzve kundër gripit dhe hepatitit A dhe B, të cilat janë të gjitha të shkaktuara nga viruset. Ata krahasuan përgjigjet e antitrupave të individëve që flinin shtatë deri në nëntë orë në natë (niveli i rekomanduar për të rriturit e shëndetshëm) dhe atyre që flinin më pak se gjashtë orë në natë. Hulumtimi gjeti prova të forta se gjumi për më pak se gjashtë orë zvogëlon përgjigjen imune ndaj vaksinimit tek burrat – megjithëse efekti ishte më i ndryshueshëm tek gratë, ndoshta për shkak të luhatjeve të niveleve të hormoneve seksuale. “Ne e dimë nga studimet e imunologjisë se hormonet seksuale ndikojnë në sistemin imunitar. Tek gratë, imuniteti ndikohet nga gjendja e ciklit menstrual, përdorimi i kontraceptivëve dhe [nëse kanë kaluar nëpër menopauzë], por për fat të keq, asnjë nga studimet që përmbledhëm nuk kishte të dhëna për nivelet e hormoneve seksuale”, tha Spiegel. Kur u morën parasysh të dyja gjinitë, efekti i gjumit të shkurtër ishte i krahasueshëm me zbehjen e përgjigjes së antitrupave ndaj vaksinës Pfizer/BioNTech pas dy muajsh, raporton Guardian, përcjell Klankosova.tv. “Nëse është e ngjashme me vaksinat e gripit dhe hepatitit… atëherë gjumi i pamjaftueshëm gjatë kohës së vaksinimit Covid-19 mund të zvogëlojë numrin e antitrupave në të njëjtin interval si zvogëlimi i përgjigjes ndaj vaksinës më të administruar gjatë dy muajve”, thanë studiuesit.