Trafiku i armëve mes Kosovës e Shqipërisë vijon dhe personat e radhës, të vënë në pranga janë dy shqiptarë, të cilët mësohet se kishin vite të skeduar
Ata kanë udhëtuar nga Kosova drejt Tiranës, por policia jonë, edhe pse ka nisur ndjekjen që në Morin të Kukësit nuk i ka lënë dy personat të vijojnë rrugën, por ka ndërhyrë në një pikë karburanti, në fakt, vend i njohur mes Lezhës dhe Fushë-Krujës duke i vënë në pranga. Për pasojë policia humbi mundësinë të vinte në pranga edhe persona të tjerë, të cilët kishin bërë porosinë e armëve, pasi dy transportuesit nuk ia arritën dot të hynin në Tiranë. Policia ka njoftuar dje se njëri nga të arrestuarit është person i njohur, jo vetëm në trafikun e armëve.
Ai rezulton i dënuar me burg në Zvicër ndërsa nuk është bërë e mundur të mësohen emrat e blerësve. Armët, që u kapën në mjetin me të cilin udhëtonin dy shqiptarët e Kosovës u tha se ishin model belg dhe sipas të dhënave policore, dyshohet se do të shiteshin në vlerën e 10 mijë eurove. Brenda harkut kohor të një viti ky është operacioni i tretë ku u goditën trafikantë armësh nga Kosova në vendin tonë.
TË DHËNAT E OPERACIONIT
Siç u mësua pak çaste pas ndërhyrjes policore, dy shqiptarë të Kosovës u vunë në pranga për trafik armësh. Ndërhyrja e agjentëve të policisë ndodhi në një pikë karburanti në autostradën Milot-Fushë Krujë, pasi aty dy trafikantët ndaluan mjetin e tyre me targa të Kosovës, në të cilën dyshohej se fshiheshin armë. Policia e ndoqi makinën ngjyrë gri që prej momenteve që kaloi pikën kufitare të Morinit, pasi kishin marrë informacion se do të niseshin drejt Tiranës me qëllim trafikimin e armëve. Në të udhëtonin 2 persona, të cilët u arrestuan pasi në pjesën e përparme të makinës u gjetën 2 pistoleta.
Trafikantët ishin munduar t’i fshehin mirë poshtë kofanos së makinës, por gjatë kontrollit u gjetën dhe sekuestruan. Bëhet fjalë për 2 pistoleta prodhim belg i viteve të fundit, me njërën prej tyre model i veçantë. Të dy pistoletat, sipas policisë, do të shiteshin në Tiranë me një çmim prej 10 mijë eurosh. 2 të arrestuarit nuk janë treguar bashkëpunues me policinë, pasi në seancën e marrjes në pyetje nuk kanë pranuar të tregojnë ku do i shisnin armët.
Me anë të një njoftimi zyrtar policia bëri me dije se “janë vënë në pranga 2 shtetas kosovarë, të cilët dyshohet se i kanë trafikuar 2 pistoletat, me qëllim shitjen në Tiranë, me vlerë afro 10 000 euro. Si rezultat i hetimeve disamujore të kryera me metoda proaktive, në drejtimin e Prokurorisë, për goditjen e veprimtarisë kriminale të shitjes së armëve të zjarrit, u arrestuan Altin Pajaziti, 23 vjeç dhe Kadri Prushi, 53 vjeç, të dy banues në Kosovë.
Gjatë operacionit, shërbimet e Policisë kanë ndaluar në autostradën “Lezhë – Fushë Krujë”, automjetin me të cilin qarkullonin shtetasit Altin Pajaziti dhe Kadri Prushi, në të cilin, gjatë kontrollit, kanë gjetur dhe sekuestruar 2 armë zjarri pistoleta dhe municion luftarak. Nga hetimet dyshohet se këta shtetas i kanë trafikuar pistoletat nga Kosova, me qëllim shitjen në Tiranë”,-njoftoi policia.
Njëri prej të arrestuarve, Kadri Prushi, rezulton të jetë dënuar me burg në Zvicër për trafik droge, ndërsa është i skeduar edhe për trafik armësh, nga vende të Europës, në Kosovë, Shqipëri e më gjerë. Policia nuk e përjashton mundësinë e përfshirjes së personave të tjerë në trafik armësh, ndërsa po punohet për identifikimin e tyre./Panorama/
