Pllana: Shkaku i infrastrukturës, garuesit tonë dështuan në Kampionatin Evropian

Të dielën ka përfunduar Kampionati Evropian i Shenjëtarisë, ku pjesë marrës ishin edhe garuesit nga Kosova. Për Klan Kosovën ka folur kryetari i kësaj federate, Ali Pllana. Ai ka thënë se kjo ishte edhe gara e fundit për të fituar të drejtën për pjesëmarrje në Lojërat Olimpike Rio 2016. Sipas Pllanës përfaqësuesit e Kosovës dështuan të qëllojnë me qitje me armë ajrore në dhjetë metra – e kjo krejt si pasojë e mungesës së përvojës ndërkombëtare. “Në Kosovë nuk ka asnjë Poligon i qitjes që i ofrohen kushteve normale, në të cilat zhvillohen garat ndërkombëtare. Poligoni në Pallatin e Rinisë dhe Sportit,  është ndërtuar në vitin 1976, dhe nga ajo kohë nuk është përmirësuar apo ndërtuar diçka që kishte përmirësuar ambientin për qitje”. Ai ka thënë se ndriçimi shumë i dobët që ata kanë në sallat ku i kryejnë përgatitjet  po u paraqet problem garuesve pasi që në garat ndërkombëtare ku aplikohen caqet elektronike, me ndriçim tjetër dhe monitor për përcjelljen e goditjeve në cak. “Nëse kësaj i shtojmë edhe drynosjen e Poligonit në Pallatin e Rinisë në kohëzgjatje tremujore, është një telashe që ka ndikuar negativisht në përformancen e garueseve”, ka thënë Pllana. Edhe përgatitja psiqike sipas Pllanës ka ndikuar në plasma, pasi që garuesit kanë pasur presionin e Rio 2016. Pllana ka kërkuar ndërhyrjen e qeverisë për ngritjen e infrastrukturë - Poligoneve të shenjëtarisë, për të krijuar ambientin e përafërt me ato ku zhvillohen garat. Nuk mund të presim rezultate të larta, përveç në kategorinë e juniorëve. Mungesa e përvojës së garave ndërkombëtare pa dyshim se ndikon në plasmanin e garuesëve tonë”, ka thënë Pllana.