Politika pengon pjesëmarrjen e Kosovës në botërorin e boksit në Spanjë

Boksierët e Kosovës përsëri kanë problem për pjesëmarrjen në  kampionate botërore nga shtetet të cilat nuk e njohin shtetin e Kosovës. Rasti i fundit është Kampionati Botëror në Alicane, La Nucia Spanjë 13 – 27.11.2022. Ekipi i Kosovës me kohë është paraqitur për pjesëmarrje në ketë kampionat botëror dhe ka aplikuar për viza, për boksierët: Taulant Jakupi (86kg) dhe Donat Syla (92kg), selektorin Besim Brahimi dhe gjyqtarin ndërkombëtar Latif Demolli. "Dje më 10 nëntor kemi marrë përgjigje negative për viza nga ambasada Spanjolle në Shkup të Maqedonisë Veriore. Ne kemi kërkuar sqarime nga Federata Botërore IBA për mos pajisje me viza, por jemi shumë të pikëlluar që morëm këtë lajm dhe e konsiderojmë vërtet të papranueshëm, pasi besojmë se politika nuk duhet t'i ndalojë sportistët tanë të marrin pjesë”, shkruan Federata e Boksit të Kosovës. Kjo nuk është hera e parë që si pjesë e Federatës Botërore IBA nuk lejon të marr pjesë kosovarët në ngjarje botërore, ashtu siç kishte ndodhur në Indi, Serbi, e tash në Spanjë. Nga federata është thënë se: “Boksierët tanë të përfaqësueses janë përgatitur maksimalisht, janë ne formë të mirë dhe është një ëndërr e madhe për ta që të jenë pjesë e këtij kampionati botëror. Ne kemi kërkuar nga IBA që të angazhohet dhe të bëj përpjekje që boksierët tanë të trajtohen në mënyrë të barabartë dhe të kenë të drejtë të marrin pjesë në të gjitha ngjarjet e mëdha si gjithë boksierët e federatave të tjera që janë nën ombrellën e IBA-së”.