Pos Kurtit, ministri belg takohet edhe me Konjufcën e Haxhiun

Zëvendëskryeministri dhe ministri i Punëve të Jashtme të Belgjikës, Maxime Prevot do të zhvillojë një vizitë zyrtare në Kosovë. Ai do të pritet nga kryeministri i Kosovës, Albin Kurti me fillim të orës 13:30 në objektin e Qeverisë. Pos tij, ministri belg do të zhvillojë takim edhe me homologun e tij nga Kosova, Glauk Konjufca, me të cilin do të mbajnë konferencë të përbashkët për media, transmeton Klankosova.tv. Maxime Prevot do të pritet edhe nga ushtruesja e detyrës së presidentes, Albulena Haxhiu. Sipas njoftimit, takimi mes tyre nis në orën 16:00. Vizita e kryediplomatit belg është pjesë e një turi në rajon, gjatë të cilit ai do të qëndrojë edhe në Mal të Zi, Serbi, Maqedoni të Veriut dhe Bosnje dhe Hercegovinë.

Ndërkohë, ai ka bërë të ditur se Shqipëria do të vizitohet në një fazë të mëvonshme, kur pritet edhe hapja e ambasadës belge në Tiranë.