Premtimi i Berishës: Qeveria do i paguajë 1 vit sigurimet shoqërore sipërmarrësit që do të punësojë një të ri

Kryetari i Partisë Demokratike të Shqipërisë, Sali Berisha, është shprehur se nëse subjekti që ai drejton i fiton zgjedhjet e 11 majit, qeveria e ardhshme do i paguajë 1 vit sigurimet shoqërore çdo sipërmarrësi që do të punësojë një të ri. Sipas A2CNN,  Berisha kështu u shpreh derisa ishte duke e bërë prezantimin të kandidatëve të Aleancës për Shqipërinë Madhështore në Vorë dhe Kashar. "Qeveria do paguajë çdo gjë, të gjitha shpenzimet për trajnimin e të rinjve para se të fillojnë punën. Qeveria do të financojë me kredi të buta çdo projekt të tyre për të ndërtuar një biznes të vogël, një start up, do t’i bëjë atyre të mundur. Një çati për çift, do të jetë zotimi ynë para atyre". "Një çati për çift do të thotë se, qeveria do t’i mbulojë të rinjve me një grant prej 30 mijë eurosh, të gjithë interesin e kredisë për blerjen e shtëpive. Dhe se, ata të cilët do të bëhen me 3 fëmijë, kredinë do ta kenë të paguar tërësisht nga qeveria". "Pra, miqtë e mi, familja shqiptare pas 11 majit do të ketë mundësi të tjera. Rroga minimale, nuk do jetë kurrë ndër 500 euro. Çdo sipërmarrësi do t’i kompensohet me ulje taksash rritja e rrogës minimale në 500 euro. Rroga mesatare do të jetë 1200 euro. Po rrogat mbi minimale, që të gjitha, me një vendim të vetëm qeverie, rriten me 13%, sepse ne do të ulim tatimin mbi të ardhurat personale nga 23% në 10%", u shpreh Berisha, sipas A2CNN.