Presidenti i Lituanisë: Avionë rusë shkelën hapësirën ajrore të vendit

Dy avionë ushtarakë rusë kanë hyrë përkohësisht në hapësirën ajrore të Lituanisë, në atë që autoritetet e vendit e kanë cilësuar si një provokim të ri nga Moska. Incidenti ndodhi ndërsa liderët e Bashkimit Evropian po diskutonin në Bruksel mbi forcimin e mbrojtjes evropiane, në sfondin e shqetësimeve se lufta në Ukrainë mund të përhapet edhe në vendet fqinje. Sipas forcave të armatosura lituaneze, bëhet fjalë për një avion luftarak Su-30 dhe një avion cisternë Il-78, të cilët dyshohet se po kryenin stërvitje furnizimi me karburant në ajër mbi rajonin rus të Kaliningradit, kur kaluan rreth 700 metra brenda hapësirës ajrore të Lituanisë, rreth orës 18:00. Presidenti Gitanas Nausėda e quajti incidentin “një shkelje të hapur të ligjit ndërkombëtar dhe të integritetit territorial të Lituanisë”.“Ne do të thërrasim përfaqësuesit e ambasadës ruse për të protestuar kundër këtij veprimi të pamatur dhe të rrezikshëm,” shkroi ai në rrjetin social X . Nga ana e saj, Ministria ruse e Mbrojtjes mohoi shkeljen, duke deklaruar se fluturimet ishin kryer në përputhje të plotë me rregullat ndërkombëtare” dhe “pa devijuar nga itinerari i planifikuar./Klankosova.tv