Presidentja hungareze s’do viza për kosovarët (VIDEO)

Me nderimet më të larta shtetërore presidentja e Hungarisë, Katalin Novak, u prit paraditen e së martës nga homologia e saj Vjosa Osmani. Derisa zotërinjtë e parë i përcillnin nga prapa, dy gratë më të fuqishme të dy shteteve kaluan përmes tapetit të kuq për të vazhduar më pas muhabetin brenda. Pas kryerjes së takimit, që u mbajt me dyer të mbyllura, të njëjtat treguan se pjesë të bisedës e kishin edhe të ardhmen euro-atlantike të Kosovës. “Sa i përket liberalizimit të vizave për Kosovën kemi qenë në favor të saj që prej ditës së parë. Duam që ato të hiqen sa më shpejtë që është e mundur, zonja presidente mund të llogarisë tek unë. Ne do të bëjmë çdo gjë në fuqinë tonë që Kosova të marrë liberalizimin e vizave sa më shpejtë që është e mundur”, tha Novak. Aty u fol edhe për dialogun me Serbinë, derisa Osmani ia bëri me dije homologes së saj se në këtë çështje nuk lëshojnë pe pa u njohur reciprokisht. https://www.youtube.com/watch?v=-Fm_qy7K5Z0&t=12s