Profil i konsoliduar sigurie, Faik Basha në garë për drejtimin e Gardës në prag të Samitit të NATO-s 2027

Në një moment kur siguria institucionale e Shqipërisë raportohet se po përballet me sfida të reja, Faik Basha ka hyrë zyrtarisht në garë për postin e Drejtorit të Përgjithshëm të Gardës së Republikës. Basha ka një profil të ndërtuar mbi arsimim ushtarak, trajnim të specializuar dhe përvojë të gjerë në fushën e sigurisë. Kandidatura e tij vjen në një kontekst strategjik, për shkak të përgatitjeve për Samitin e NATO-s 2027, një ngjarje që do të testojë seriozisht kapacitetet e sigurisë institucionale të vendit dhe besueshmërinë ndaj partnerëve euroatlantikë. Ai është i diplomuar në Universitetin Ushtarak “Skënderbej” dhe ka ndjekur kurse e trajnime të specializuara mbi sigurinë, terrorizmin, menaxhimin e rrezikut dhe mbrojtjen, brenda dhe jashtë vendit. Po ashtu, ka shërbyer në Forcat e Armatosura, ka ushtruar funksione drejtuese në Policinë e Burgjeve, ka drejtuar Policinë Bashkiake dhe ka qenë drejtues i kompanive private të sigurisë, duke ndërtuar një eksperiencë shumëdimensionale në struktura kyçe. Përtej funksioneve drejtuese, Basha njihet prej vitesh edhe si ekspert i sigurisë dhe mbrojtjes, me kontribute analitike në media mbi çështje të sigurisë kombëtare dhe ndërkombëtare, çka shihet si vlerë e shtuar për drejtimin e një institucioni me përgjegjësi të lartë kushtetuese. https://www.youtube.com/watch?v=a6-Albb8xyc