Projektin e blerë nga Ministria e Kulturës, deputeti i VV-së e quan dhunë psikologjike

Deputeti i Lëvizjes Vetëvendosje, Gramos Agusholli, ka akuzuar për dhunë psikologjike mbi të rriturit dhe fëmijët Ministrinë e Kulturës për blerjen prej 10 mijë eurosh të një fotografie, që mban titullin “Dita e Shën Valentinit” dhe që shfaq dy çifte vajzash duke u puthur. Agusholli, mes tjerash, vë në dyshim nëse kjo fotografi përmban art dhe, sipas tij, është absurde tendenca që dhunshëm me normalizu seksualitetin e dikujt, njofton Klankosova.tv. “Për këtë foto janë ndarë 10 mijë euro prej buxhetit të Kosovës. Me taksat tona financohet ky projekt 'arti'. Absurde është tendenca që dhunshëm me 'normalizu' seksualitetin e dikujt. Dhunë psikologjike mbi ne dhe fëmijët tonë”. “Askujt mbi këtë tokë nuk po i intereson çka bëni ju nëpër shtëpitë tuaja. Pse po besoni që keni kaq shumë relevancë?! Shumë zor po i japin disa, e prapë as nuk po i duan as nuk po i pranojnë." “Krejt aparatin propagandistik, fondet dhjetëra milionëshe, edhe rezultati në fund zero. Për disa përshkrimi i punës: Ndjekim fonde! Sqarim për fund: Te unë nuk pinë ujë: cancel kultura, presioni, shantazhi e aq më pak ofendimet,” ka shkruar Agusholli në Facebook.