Prokuroria propozon dënim me burgim ndaj të miturit për vrasjen e policit në Kaçanik

Prokuroria Themelore në Ferizaj, Departamenti për të Mitur, ka paraqitur propozim për shqiptimin e dënimit me burgim për të mitur ndaj të miturit lidhur me rastin e vrasjes së zyrtarit policor në Kaçanik, Muhamed Lika. Rasti pati ndodhur me datë 01.04.2025, rreth orës 23:00, në Kaçanik, në rrugën “Idriz Seferi”, saktësisht në objektin banesor, kur, sipas Prokurorisë, “i mituri në bashkëkryerje me të pandehurit, me dashje dhe përgatitje paraprake ka privuar nga jeta tani të ndjerin- zyrtarin policor M.L., në atë mënyrë që derisa viktima ka përfunduar orarin e punës së detyrës zyrtare dhe gjatë rrugës për në banesën e tij, ishte përcjellë në vazhdimësi nga i mituri dhe të pandehurit deri te hyrja e banesës së tij, ku pasi që hynë në objektin e banesës, duke u ngjitur shkallëve lart, i mituri i shkon mbrapa dhe hynë brenda, me ç‘rast me të takuar të ndjerin ka shtënë katër (4) herë në drejtim të tij me armë zjarri të kalibrit 9.19 mm dhe brenda një intervali kohor rreth 47 sekonda, i mituri del duke vrapuar në drejtim të lokalit ‘Dukagjini’ ku bashkohet me të pandehurin R.M., i cili kishte qenë duke e pritur dhe së bashku largohen përmes rrugës ‘Mejdi Dalloshi’, ku derisa ishin duke vrapuar i mituri, i pandehuri dëgjohet duke thënë ‘Bravo, ik’”. Si pasojë e këtyre të shtënave, nga plagët e marra, policia Lika vdes, siç është konstatuar në raportin e autopsisë, me të cilin, Prokuroria Themelore e Ferizajt thotë se konstatohet se shkaku i vdekjes ka ardhur si pasojë e plagëve të marra nga predhat e armës së zjarrit. “...andaj, me këtë ka kryer veprën penale në bashkëkryerje ‘Vrasje e rëndë’ nga neni 173 paragrafi 1 nën paragrafi 1.9 lidhur me nenin 31 të Kodit Penal të Republikës së Kosovës”, thuhet në njoftimin e Prokurorisë. I mituri gjendet nën masën e paraburgimit që nga data 21 prill 2025. /Klankosova.tv