Protestat "No Kings" fillojnë, teksa tubime të mëdha kundër Trumpit përfshijnë ShBA-në

Një protestë e planifikuar kundër presidentit amerikan Donald Trump ka filluar në New York, e para nga më shumë se 2,500 tubime të organizuara nga njëri bregdet në tjetrin në të gjithë ShBA-në, të shtunën. Mijëra njerëz kanë mbushur tashmë sheshin “Times Square” për eventin e organizuar nga “No Kings”, një koalicion grupesh me prirje të majta. Demonstratat në qershor tërhoqën mbi pesë milionë njerëz në të gjithë vendin dhe ishin kryesisht paqësore. Aleatët e Trumpit kanë akuzuar protestuesit se janë aleatë me lëvizjen e ekstremit të majtë Antifa dhe kanë dënuar atë që e quajtën "tubimi i urrejtjes ndaj Amerikës". Guvernatorët republikanë në disa shtete amerikane kanë vendosur trupat e Gardës Kombëtare në gatishmëri, por nuk është e qartë se sa do të jetë prania ushtarake. Protestat pritet të vazhdojnë në të gjithë vendin gjatë gjithë ditës. Në Washington DC, senatori i Vermontit, Bernie Sanders, pritet të jetë një nga folësit kryesorë, me ngjarjet që fillojnë rreth mesditës sipas orës lokale. Organizatorët e protestës thonë se tubimi do të sfidojë "autoritarizmin" e Trump. "Presidenti mendon se sundimi i tij është absolut", thonë ata në faqen e tyre të internetit. "Por në Amerikë, ne nuk kemi mbretër dhe nuk do të tërhiqemi përballë kaosit, korrupsionit dhe mizorisë." Në të gjithë Evropën, protestuesit kanë dalë në rrugët e Berlinit, Madridit dhe Romës për të treguar solidaritet me homologët e tyre amerikanë, shkruan BBC, transmeton Klankosova.tv.