“Provimi” interesant, maturantët testohen për siguri në rrugë (VIDEO)

Lëvizja e flamurit sinjalizon nisjen, e biçiklisti ka një shteg jo fort të lehtë për të kaluar. Në këtë mënyrë janë trajnuar maturantë të shkollave të ndryshme të Kosovës, që morën pjesë në edicionin e tetë të rivistës “Siguria në rrugë 2023”. “Sot mbushëm 10 vjet të këtyre aktiviteteve jashtë-mësimore, por edhe mësimore, nëpër nivele të ndryshme të shkollave në mbarë Kosovën. Deri tani përmes këtyre aktiviteteve kanë kaluar më se 10 mijë nxënës, një armatë e tërë e nxënësve dhe qindra shkolla”, u shpreh Muhamed Krasniqi, Drejtori i akademisë "Tempulli", raporton Klan Kosova. Ai pohoi se aktivitetin e garave me biçikleta, që të martën u mbajt në sheshin “Xhorxh Bush” në Prishtinë, e ndihmoi Ministria e Arsimit, e cila secilin vit përzgjodhi shkolla të ndryshme. Ndërkaq nga Komuna e Prishtinës u zotuan se po punojnë në sigurinë e shtigjeve për biçikleta. “Jemi në procedura finale të përfundimit të projektimit të këtij sheshi që të jetë edhe më i sigurt, por që për ne mbetet prioritet zvogëlimi i numrit të makinave. Me këtë rast edhe përdorimi sa më i madh i biçikletave”, tha Donjeta Sahatçiu, nënkryetare e Komunës së Prishtinës. Nga policia thanë se e mbështesin çdo aktivitet që ka qëllim uljen e rasteve të aksidenteve në rrugë. “Fokus kanë qenë klasat e 12-ta, ku për ne është me rëndësi meqë kjo moshë është ku pothuajse shumica prej tyre do ta kenë fatin që t’i nënshtrohen testit të pjesës teorike apo marrjes së patentë-shoferit”, deklaroi Jeton Rexhepi, nënkolonel i Policisë së Kosovës. Fituesit e vendit të parë, të dytë e të tretë morën nga një biçikletë dhuratë. /Klankosova.tv *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS. https://www.youtube.com/watch?v=CtfUMN8S_uA