Punimet e Jakup Ferrit, Jeton Gusisë dhe Arian Berishës prezantohen në Prishtinë

Në Qendrën e Artit “Ulpiana” në Prishtinë, sot nga ora 18:00 hapet ekspozita e tretë dhe e fundit e programit “Komunikimi me Komunitetin”. Në këtë ekspozitë grupore do të prezantohen punimet e artistëve Jakup Ferri, Jeton Gusia dhe Arian Berisha, nga koleksioni i artit të Rasim Merlakut. Jakup Ferri eksploron vizatimin, tapiseritë, mozaikët dhe pikturën, duke bashkëpunuar shpesh me artistë autodidaktë dhe popullorë. Praktika e tij reflekton mbi identitetin, lidhjen, dështimin dhe dëshirën për të qenë pjesë e diçkaje. Jeton Gusia krijon piktura të mbështetura në jetën e përditshme, ëndrrat dhe shpresat, në kontekstin kulturor dhe historik të Kosovës. Puna e tij lidh përvojat personale dhe kolektive për të nxitur mirëkuptim. Arian Berisha krijoi piktura dhe vizatime ekspresive të ndërtuara nga ndjenja dhe përjetimi i ngjarjeve. Veprat e tij vlerësohen për energjinë e tyre të pashuar, të pasionuar dhe të fuqishme. Ekspozita do të jetë e hapur deri më 10 tetor 2025./Klankosova.tv