Qeveria vendos, Kuvendi e ka në dorë dërgimin e trupave të FSK-së në Gaza

Qeveria e Kosovës, gjatë mbledhjes së sotme ka miratuar vendimin për të dërguar në Kuvend, projektligjin për dërgimin e trupave të FSK-së në Gaza. Kryeministri Albin Kurti tha se Kosova është e gatshme të ndihmojë popullin e Gazës, transmeton Klankosova.tv. “Ne jemi të gatshëm të marrim pjesë në forcën stabilizuese, dhe të ndihmojmë popullin e Gazës”, tha kryeministri Albin Kurti. Ministri i Mbrojtjes, Ejup Maqedonci, gjatë mbledhjes së qeverisë, theksoi se dërgimi i FSK-së në këtë mision përfshinë pjesëmarrjen e personelit të Forcës së Sigurisë së Kosovës në kuadër të komandës së unifikuar të forcës ndërkombëtare të stabilizimit. “Ajo ka për mision të mbështesë zbatimin e planit gjithëpërfshirës, për t’i dhënë fund konfliktit në Gaza”, u shpreh Maqedonci.