QKUK kryen me sukses një operacion të rrallë, 27-vjeçarit i shpëtohet parakrahu i prerë

Në sallën operative të Klinikës Emergjente të Qendrës Klinike Universitare të Kosovës, është kryer me sukses një operacion shumë i rrallë dhe i ndjeshëm, për herë të parë në Kosovë. Në momentin e pranimit në Klinikën Emergjente, pacienti (një 27-vjeçar) e kishte prerë pothuajse komplet parakrahun e majtë me fleks, në vendin e punës. “Mjekët kirurgë, me punë ekipore, (ekipi e Kirurgjisë Vaskulare që e udhëhoqi operimin, ekipi i Klinikës së Ortopedisë, Kirurgjisë Plastike dhe Rekonstruktive dhe Neurokirurgjisë), bashkë me anesteziologë dhe pjesën tjetër të ekipit operativ, kanë kryer operimin te një pacient 27 vjeç duke i realizuar dy bypasse (urëzime), në pjesën më distale të arteries radiale dhe ulnare, (arterie që ushqejnë dorën me gjak)”, thuhet në njoftimin e ShSKUK-së. Pas operacionit janë kryer ekzaminimet kontrolluese, ku është konstatuar se intervenimi kirurgjik ishte kryer me sukses dhe pacienti pas 14 ditë hospitalizimi, sot është  liruar për në shtëpi, në gjendje të mirë shëndetësore.